Հայաստանում, 2019-ի վերջի տվյալներով, տնային խնամք է ստանում՝ - պետական աջակցությամբ` 1350 տարեց, - շահառուների մասնավոր պատվերով` 1748 մարդ` հիմնականում տարեց։ Ծառայությունն իրականացնում է «Առաքելություն Հայաստան» կազմակերպությունը։ |
Պերճուհի Ամեն երկուշաբթի, չորեքշաբթի ու հինգշաբթի՝ առավոտյան, Սվետան այցելում է 99-ամյա Պերճուհուն։ Պետության կողմից տրամադրվող անվճար ծառայությունից զատ, Պերճուհին իր թոշակից վճարում է, որ Սվետան շաբաթվա մեջ երկու օր ավելի իրեն օգնի։ Պերճուհին ծնվել է Խորհրդային Հայաստանի կազմավորման առաջին տարիներին։ Ասում է՝ ընտանեկան դժբախտություններով լի մանկություն ու պատանեկություն է ունեցել։ |
«Շատ շահառու ունեմ 90-ն անց՝ 94, 98, 99 տարեկան։ Մինչեւ 80 տարեկանները քիչ են։ Ամսական սպասարկում եմ մինչեւ 18-19 հոգու»,- Պերճուհու տանից դուրս գալով՝ ասում է Սվետան ու վերհիշում իր հանրահայտ շահառուներին։ «Անժելա Շահնաբաթյանին, Դավիթ Պողոսյանին՝ «Սայաթ Նովա» ֆիլմում Աշուղ Ֆաթուլայի դերն էր խաղում, ասմունքող Թամարա Դեմուրյանին՝ կուրացել էր։ Երգչուհի Ռոզա Վարդանյանին պահեցի քանի տարի, ինձ մոտ էլ մահացավ, «Առաքելություն Հայաստանի» երգչախմբի անդամ էր»։ Ասում է՝ տարիներ առաջ շահառուներին ավելի հեշտ էր բավարարել. կյանքը որքան լավացել է, մարդիկ ավելի դժգոհող ու պահանջկոտ են դարձել։ Բայց Պերճուհին ու Ալիսը՝ մյուս շահառուն, այդպիսինը չեն։ |
Ալիս Դեռ Ալիսին չբարեւած՝ Սվետան գործի է անցնում։ - Էսօր գլուխդ լվանանք։ Էսօր օ՞րն ա, չէ՞։ Լա՞վ ես զգում քեզ։ - Հա, բա, պիտի՞ չլվանայիր։ - Հա, պիտի լվանանք, սրբիչդ ու՞ր է։ - Էստեղ է։ - Դե արի բրդից շորդ հանենք, որ չթրջվի։ |
Սվետլանա Ալիսի տանից Սվետան գնում է իր ամենաերիտասարդ շահառուներից մեկի՝ 72 տարեկան Սվետլանայի տուն, որը երկու տարի առաջ է ընդգրկվել ծրագրում ու արդեն հասցրել է մտերմանալ իրեն խնամող-օգնողի հետ։ Սվետլանան 40 տարի Պետական մանկավարժական համալսարանում է աշխատել, մանկավարժության ամբիոնում կաբինետի վարիչ է եղել․ «8 տարի առաջ թոշակի ուղարկեցին, ես չեմ դուրս էկել, իրենք ինձ դուրս հանեցին։ Ինչ դուրս հանեցին, ես հիվանդացա»։ |
Աշխատանքային օրն ի վերջո ավարտվում է։ Սվետան դուրս է գալիս շահառուի տանից, բայց նա չի հեռանում. նրան ամեն օր սպասում են... |